【中文】記敘文高分要訣 其實唔難,只要有方法

上次講完說理文點寫先會高分,今次我就分享下記敘文寫作既高分要訣啦!





卷二寫作類



  1       說理為主,抒情為輔

大家通常會將每年作文題目 Q1 稱為「記敘抒情文」。但其實呢個概念係錯既,因為咁多年黎考評局出既記敘式題目都無要求過大家「抒情」;相反,每年既記敘寫作題都係要求大家「說理」-即係透過敘事帶出處世道理。例如2012年要帶出中國文化可貴的一面、2013年要帶出「己所不欲,勿施於人」等等。因此,大家作記敘文既時候,千祈唔好將篇幅集中響「感情」既抒述,而應該集中透過敘事「說明道理」


  2     設計反省段,清晰說理

承上,由於記敘文寫作主要係想大家透過敘事「說理」,因此,我會建議各位同學響文章中後段加入「反省段」-意思即係主角經歷事件之後,內心既獨白。再講白少少,就係叫大家響寫完件事之後,用返 200-300 字去說明件事帶出左d咩道理。反省段唔要求寫得文筆優美,但就要求各位闡述清晰,「畫公仔畫出腸」,將文章立意由頭到尾說明一次,咁先能夠令考官清晰了解你的文章主題,幫你響考試入面拎分。


  3       善用比喻及對話

相比起說理文,記敘文更要求各位響文筆上多下工夫。而最常用響記敘文入面既寫作手法就係「善用比喻」同「多用對話」啦!曾經見過有同學寫記敘文,一句對白都無,淨係一味敘事。但如果你文字功力無返咁上下,係好難寫出一篇無對白而又生動既文章。因此,大家寫記敘文時不妨多設計對話情節,一黎令文章生動 d,二黎亦都可以諗少 修辭位 ( 因為對話入面通常都係直述 問句,正常人講野唔會話「丫,我真係焦急到有如熱鍋上既螞蟻啊!」架嘛!),係咪?


  4       練習「機械式寫作模式」

最後,其實每年既記敘文寫作題目都大同小異,分別只在於限制同立意有所不同。因此,如果大家只求考試高分,其實係應該設計定兩、三套既定既寫作模式,諗定曬邊d位用對話,邊d位用比喻,邊d位要寫長d,邊d位要寫短d… …然後用呢套模式不斷寫唔同既題目,不斷改良,務求最後響文憑試入面能夠成為一個「機械人」,倒模咁倒篇文出黎,咁就自然唔會唔夠時間寫或者令文章詳略失衡啦!




Source: chinese.exam.skills